Кытайда генерал Шәйморатов эзләре табылган

Шәһәр буйлап экскурсия вакытында тарих-туган як музеенда гаҗәеп вакыйга булды.

Балаларның игътибарын көтмәгәндә Кытай провинцияләренең иске фотографияләре урнаштырылган стенд җәлеп итте. Якыннанрак танышкач, аның башкорт генералы Миңнегали Шәйморатовның 1936-1937 елларда хәрби атташе сыйфатында Кытайга эш сәфәренә багышланган булуы ачыкланды. Ул биредә Кытайның Кызыл армиясе өчен командирлар һәм сәяси хезмәткәрләр әзерләүдә катнашкан. Тяньцзинь кунакларына иленең азатлыгы һәм бәйсезлеге өчен көрәштә башкортларның чәмле катнашуын белү куанычлы иде.

Этнография залында үсмерләр милли киемнәр күргәзмәсеннән озак китә алмады. Алар бер-бер артлы сорау яудырды: ни өчен башкорт хатын-кызлары киемендә тәң-кәләр күп? Борын заманнарда аларны каян алганнар? Чабата аякны өшеткәнме һәм ул күпмегә чыдаган? Музей хезмәткәрләре рөхсәте белән алар күмер тутырылган борынгы үтүкләрне сак кына тотып караган һәм башкортларның борынгы торак-тирмәләре турында сөйләүне үтенгән. Аларның сүзләренә караганда, башкортларның көнкүреше нәрсәсе беләндер монголларныкын хәтерләтә.

– Безнең шәһәрдә музейлар күп. Килеп чыгышы белән генә түгел, рәвеше һәм эчтәлеге белән дә, – ди кунаклар. – Мәсәлән, шәһәр музее тыштан күлдән очып китәргә әзерләнгән, канатларын җәйгән аккошны хәтерләтә. Киң танылганы – табигый фәннәр музеена кимендә бер гасыр элек француз миссионеры нигез салган. Бу оешмаларга сәяхәтчеләр генә түгел, төбәк халкы да бик теләп йөри. Туймазы музеенда башкорт мохите-көнкүрешенең тәкъдим ителеше, башкорт халкының гүзәллеген ассызыклау ошады. Бирегә килгәнче сезнең республика турында күп укыдык, әмма музейда тагын да күбрәк белдек.