“Мин заводтан киттем, әмма ул минем күңелемдә калды”

Шәһәрнең мактаулы кешесе Николай Тарасов машина эшләү системасына кимендә ярты гасыр гомерен багышлаган

Николай Васильевич кебек кешеләр турында: “Ходай тарафыннан яратылган”, – диләр. Зиһен тулы баш та, алтын куллар да, 50 ел бергә яшәгән сөйкемле ха­тын да, уңышлы уллар да, әйләнә-тирәсендә яхшы кешеләр дә биргән аңа Хо­дай. Тарасов үзенең гоме­рен шул бер җөмлә белән аңлатты. Чынында исә аның тормыш юлы калын дәфтәргә дә сыймас иде.

Бу малайны эшкә алыгыз!

Югалту ачысын бик иртә татый ул. Йөрәк өянәгеннән әтисе вафат булганда Нико­лайга 12 яшь кенә була әле. Ул вакытта гаилә кайчандыр Кәкребаш авыл советы ка­рамагындагы Казанка авы­лыннан Туймазыга күченеп өлгерә. Николайга эшкә чыгарга туры килә. Апасы үзенең начальнигы – меди­цина пыяласы төзелешенә җитәкчелек иткән Сергей Дадайдан энесен эшкә урнаштыруны үтенә. Шу­лай итеп 14 яшьлек Нико­лай 15нче төзелеш-монтаж идарәсенең столяр цехына эшкә килә. Агач эшкәртү серләренә төшенергә зирәк үсмергә бер ай вакыт җитә. Барлык эшчеләр төшке ашка киткәндә станок артына баса ул – агач эшкәртергә өйрәнә. Бер айдан соң Сер­гей Иеронимович: “Менә бу малайга беренче разряд бирегез”, – ди.

– Армиягә тариф челтәре буенча иң югары – җиденче разрядлы белгеч булып кит­тем,– дип хәтерли Николай Васильевич.

Хезмәт итәргә Венгриягә эләгә Тарасов. Шунда ук шофёр таныклыгы ала, шуңа күрә армия хезмәтен ма­шина руле артында үткәрә. Әмма күңеле җирдәге техни­кага түгел, һавага тартыла. Армиядән соң очучылар учи­лищесына керергә уйлый, әмма медицина комиссиясе артык бәйләнчек булып чыга – үткәрми. Николай Васи­льевич авиация белән бары­бер очраша – Уфа авиация институтында укыган чорда хәрби җыен вакытында була бу. Ул Туймазы геофизи­ка җиһазлары заводында эшләргә өлгерә, һәм завод, яшь белгечкә зур өметләр баглап, аңа предприятие стипендиясе бүлә.

Заводка әйләнеп кайткач, Николай Васильевич биредә чирек гасыр эшли. Хезмәт ба­скычыннан югары күтәрелә: столярдан директорга кадәр. Ул эшчәннәрнең хезмәт шартларын яхшырту өчен күп көч сала. Иркен ашханә һәм эшчәннәр өчен машина калдыру урыны төзелә, за­вод биләмәсе һәм тукталыш күшеге төзекләндерелә, иркен кою участогы бина­сы күтәрелә. Пар белән ягып җылыту системасы инфракызылга күчерелә, заводны яктырту һәм газ белән тәэмин итү системасы үзгәртеп корыла.