Барлык яңалыклар
Җәмгыять
9 апрель 2018, 12:25

«Өстәмә сулышым ачылды»

Гәзит укучыларыбызның чыккан мәкаләләргә карата фикере

Гәзит укучыларыбызның чыккан мәкаләләргә карата фикере


Туймазыда яшәгән Венера һәм Радик Ганиевлар туйдан соң Мәскәүгә күчеп китә. Вакытлыча кеше фатирында яши, эшкә урнаша. Радик – төзелеш фирмасына прораб, Венера хәрби госпитальдә шәфкать туташы булып эшли. Буш вакытында яшьләр әледән-әле сәяхәткә китә, яңа танышлар таба. Кыскасы, «үзләре өчен» яши. Кызы Русалинаны табарга, гаилә корып, җиде ел үткәннән соң гына тәвәккәлли.

– Кызыбызга 1,5 яшь тулгач, үзебезнең шәһәргә кайтырга – әти-әнигә якынрак булырга карар иттек, – ди Венера. – Миңа 29 яшь иде. Гаиләле яшьтәшләрем бу чорда 2-3әр балалы булырга өлгергән (чөнки күбесе «декреттан декретка яшәгән», Туймазыдан беркайчан да читкә чыкмаган) иде. Бервакыт танышларымның берсе – аллы-артлы туган ике баласын тәрбияләгән бер ханым шулай диде: «Сез дөрес эшләгәнсез – дөнья күреп йөргәнсез, ә менә минем, 30 яшькә җитүгә карамастан, бала чүпрәгеннән башка берни күргәнем юк».

Эш-мәшәкать ыгы-зыгысы икенче бала турында уйланырлык вакыт калдырмый. Тик үзләренең бердәнбер кызының әти-әнисеннән башка тагын бер якын кешесе булырга тиешлеге һәрчак күңел түрендә йөри.

– Йөклелек халәтен теркәтергә баргач, уңайсызландым, – ди Венера. – Миңа 37 яшь, тирә-ягымда исә яшьләр. Кешедән кыенсындым. Ләкин участок табибы бу яшьтә кайберәүләрнең икенчегә түгел, беренче тапкыр авырга узуын раслап юатты.

Былтыр яз көне Руслана дөньяга килә.

– Икенче баламны тапкач, үземне өстәмә сулышым ачылгандай хис иттем, гаиләм турында кайгырту өчен көч артты, тагын да илһамланып яши башладым. Тик нәни Руслананы бер-ике ел элек тапмаганлыгыма үкенәм. Шул очракта өченче бала турында уйларга вакыт күбрәк калыр иде.

Алинә МУЛЛАКАЕВА.