Җылылык өчен җаваплы

Казанлык операторының эш сменасы 12 сәгать дәвам итә

Роза Иванова (фотода) “Туймазы җылылык челтәрләре” җәмгыятендә байтак гомер эшли. Шуның дүрт елын – Кандра участогының 5нче казанлыгы операторы вазифасында. Дежурга килгәч, ул барлык җиһазларны игътибар белән карап чыга, күрсәткечләрен махсус журналга яза. Таләп ителсә, температура тәртибен үзгәртә, система сафтан чыкса, участок мастерын чакырта.

– Үткән елның октябреннән камилләштерелгән яңа казанлыкта эшли башладык, аны элеккесе урынына төзеделәр, – ди Роза Рәшит кызы. – Без элеккечә авылдагы барлык торак йортларны һәм җәмәгать объектларын хезмәтләндерәбез, әмма эшебез җиңеләйде: җылы, якты, бар нәрсә автомат режимда эшли. Казанлыклардагы җылылык чыганагы температурасына төзәтмәләр кертсәң, калганнары шуңа үзеннән-үзе яраклаша. Элек күп нәрсәне кулдан башкарырга туры килә иде.