Күперләрне яндырмыйбыз...

Балигъ булмаганнар эшләре комиссиясе белгечләре ата-аналарга һәм балаларга гаиләне саклап калырга ярдәм итү өчен кулыннан килгәннең барысын да эшли

Елена Моисеева балигъ булмаганнар эшләре һәм аларның хокукларын яклау комиссиясе рәисе урынбасары вазифасына тәгаенләнгәнче, 2015 елга кадәр мәгариф идрәсенең баш инспекторы булып эшли. Менә өч ел инде төрле хезмәт белгечләре белән бергә балаларны коткара ул. Балигъ булмаганнар эшләре һәм аларның хокукларын яклау комиссиясе хезмәткәрләренең тыгыз эш тәртибендә утырышлар (шул исәптән, күчмә) зур урын били, анда балигъ булмаганнар һәм аларның бала тәрбияләү бурычларын үтәмәгән ата-аналарына карата эшләр тикшерелә (соңгы утырышта 31 эш кузгатылган хәтта!).

Җинаять кылу һәм хокук бозуларга китергән сәбәп һәм шартлар ачыклана, идарә җаваплылыгы җәзасы чаралары кулланыла. Шуңа өстәп, гомуми белем бирү мәктәпләрендә лекция һәм әңгәмәләр, үсмерләр клублары, хезмәт, көндезге ял лагерьлары буйлап күпсанлы рейдлар... Махсус тәрбия бирү оешмаларыннан кайтучылар белән эшләү. Аларны эшкә урнаштыру, йөрәгенә юл салу зарур: “Егетләр, яшәргә кирәк!”

Өстәлдә – кегли-«шешә»

– Тормышның бу ягы минем өчен еракта иде. Мин гомер буе гадәти балалар белән эшләдем, – ди Елена Николаевна. – Һәм көтмәгәндә – шушы катлаулы тармак. Бик авыр. Барысы да йөрәк аша үтә.

Җаваплылык йөгеннән дә котыла алмыйсың. Без күмәкләп эшлибез. Хәл-вакыйгага я ата-аналар, я балалар күзлегеннән карыйбыз. Кичә бер үсмерне вакытлыча тоткарлау-аралау үзәгенә урнаштырырга кирәкме дигән мәсьәләне хәл иттек. Законда тегесе дә, монысы да каралган. Тәҗрибәгә таянып, бала күңелен җәрәхәтләмичә, аның белән үзебез эшләргә, өендә калдырырга карар иттек. Көч куллану тармаклары вәкилләренең карашы үзгә. Һәм янә башка уй керә: “Без аны калдырырбыз да, ул ике атнадан соң янә җинаять кылыр? Аны тәүлек әйләнәсенә саклап торып булмый ич. Икенче яктан, аңа мөмкинлек биреп карарга кирәктер бит”.

Авыр затлар белән дә аралашырга туры килә. Әмма алар барысы да – Русия Федерациясе кешеләре. Аларның да ярдәмгә хакы бар. Андый мөмкинлек булса, һәр кешедә тотынырлык һәм аны сазлыктан гадәти тормышка сөйрәп алырлык нәрсә табарга тырышабыз.