Үз Платоннарыбыз һәм Невтоннарыбызны үстерәбез

7нче мәктәптә үткән бөтенрусия конференцияләрендә Русия, Германия, Вьетнам, Ангола һәм башка илләрдән балалар һәм үсмерләр катнашты

Теге яки бу мәсьәләне хәл итүгә фәнни караш гаҗәеп нәтиҗәләргә китерергә мөмкин. “Безнең югары уку йортында төрле илләрдән килгән егет һәм кызлар укый, – ди УДНТУ студенты, Анголадан килгән Франсишку Жозе Сузала. – Алар арасында дини һәм милли нигездә даими бәхәс-низаг чыга иде. Без халык фикерен ачыклагач, барысы да үзгәрде. Студентларның 83 проценты курсташларының мәдәнияте һәм гореф-гадәтләре турында күбрәк белергә тели икән. “Барыбыз да төрле-төрле, барыбыз да бертигез” милләтара аралашу клубы оештырдык. Хәзер көн саен аралашып торабыз, уртак чаралар үткәрәбез. Мөнәсәбәтләр шактый яхшырды”.