Мөмкинлек – 100 миллион сум!

Туймазы Русиянең вак шәһәрләре бәйгесенә әзерләнә

Быел гыйнварда Коломна шәһәрендә үткән вак шәһәрләр һәм тарихи биләмәләр җыенында өстенлекле «Уңайлы шәһәр мохите тәэмин итү» проектының шулай ук аталган Бөтенрусия бәйгесен үткәрергә карар ителә. Соңрак Красногорскида аны оештыру мәсьәләләренә багышланган семинар үтә. Анда төбәкләрнең төзекләндерү мәсьәләләре, шул исәптән, гаризалар әзерләү өчен җаваплы вәкилләре катнаша. Алар арасында Туймазы шәһәре шәһәр биләмәсе хакимияте башлыгы Эдуард Рәхмәтуллин да була.

– Безгә Русиянең вак шәһәрләрен һәм тарихи биләмәләрен төзекләндерү өчен федерация бюджетыннан 5 млрд сум акча бүленәчәген хәбәр иттеләр, – диде Эдуард Венер улы. – Бер төбәктән тапшырыласы гаризалар саны чикләнмәгән.