Илнең төп бәйрәмендә

Туймазы мәктәбе укучысы Кремльдә үткән чыршы бәйрәменнән якты тәэссоратлар белән кайтты

Илебезнең декабрь ахырында Мәскәүдә Дәүләт Кремль сараенда үткән төп Чыршы бәйрәмендә Башкортстаннан 114 бала катнашкан. Бу – республикабызның төрле төбәкләреннән җыелган уку алдынгылары, төрле иҗат бәйгеләрендә, олимпиадаларда, спорт ярышларында җиңгән балалар. Илебезнең төп Чыршысын күрү бәхетенә ирешкән укучылар арасында 1нче интернат-мәктәптән Радмир Гомәров та (6нчы сыйныф) булган.

- Мин Мәскәүне беренче тапкыр күрдем, – диде иҗади уңышлары өчен бу хөрмәткә лаек булган Радмир. – Без Кызыл мәйданны карап йөрдек, Кремль сәгате сукканны тыңладык. Илебез үзәгендәге Яңа ел бәйрәме күләме, махсус чаралары, артистларның чыгышлары, Кыш бабай һәм Карсылуның бүләкләре белән әсир итте.