Дәүләт ярдәменә ихтыяҗ зур

Кулланучылар кооперативы аны яшелчә саклагычлар төзүгә юнәлтүне күздә тота

2014 елда “Туймазинец” крестьян-фермер хуҗалыгының берничә әгъзасы “Туймазы яшелчәчесе” авыл хуҗалыгы сату-кулланучылар кооперативын теркәде. Хәзер алар үз яшелчә саклагычы төзү өстендә эшли.

– Безнең берләшүнең төп максаты – киләчәктә сату өчен күпләп яшелчә туплау, – дип сөйли кулланучылар кооперативы рәисе Марат Галимов. – Кооператив алты даими катнашучыдан гыйбарәт, алар исәбендә җаваплылыгы чикләнгән җәмгыять тә, шәхси ярдәмче хуҗалык та, шәхси эшкуарлар да бар. Шушы дәвердә без Татарстан, Чиләбе өлкәсе, Себер һәм Мәскәүдән берничә сәүдә челтәре белән мөнәсәбәтләр көйли алдык. Нәтиҗәдә былтыр гына да 344 тонна помидор һәм кыяр саттык. Һәм бу чик түгел әле – таләп ителсә, челтәрләргә яшелчәне дүрт тапкыр артык тапшыра алачакбыз.

Кимчелекле тәҗ-рибәне үзгәртү теләге дә бар, чөнки яшелчәче-теплицачылар тиз бозылучы уңышны түбән генә бәягә арттырып сатучыларга тапшырырга мәҗбүр. Моның өчен яшелчәне озаклап сакларга, капларга тутырырга һәм сатарга өйрәнергә телибез. Шул исәптән – борщ тупланмасы рәвешендә. Әле бөлгенлеккә төшкән предприятие бинасын сатып алу турында килешәбез, анда 2000 тонна сыйдырышлы яшелчә саклагыч урнашачак.

Бу планнарны акча җәлеп итмичә тормышка ашыру авыр. Шуңа күрә күптән түгел күп миллионлы дәүләт гранты алуга гариза тапшырдык. Дәүләт программасы шартлары буенча кооперативта катнашучылар саны унга кадәр арттырылды. Аңа кәбестә, кишер, чөгендер (борщ тупланмасы өчен тәгаенләнгән яшелчәләр) үстерүчеләр дә керде.

Әлбәттә, заманча яшелчә склады төзүгә байтак акча таләп ителә. Шуңа күрә алынган акчага 40% үз акчабызны кушарга телибез.

– Бинаны җылытырга, анда үткәргечләр һәм вентиляция корырга, яшелчәләрне аерым саклау өчен берничә климат төбәге оештырырга кирәк, – ди Марат Мөгалим улы. – Грант алалмасак та, бинаны үз көчебез белән тәртипкә китерәчәкбез. Чөнки яшелчә саклагыч – кооперативның киләчәге.