Президент булам!

Шимбә көнне бәйрәм чаралары кичкә кадәр дәвам итте

Беренче сыйныфлар өчен бәйрәм иртәннән үк башланды. Болытларга ашкан әкият каһарманнары һәм мимнар беренчеләрне шәһәр паркының спорт мәйданчыгында урнашкан борынгы патшалыкта каршы алды. Совет чоры җансурәтләре каһарманнары, шул исәптән Вова белән ике Василиса, әзерләнмәгән дәресләр иленә мавыктыргыч сәяхәт оештырды. Анда уеннар, бәйге һәм һавага берьюлы очырылган йөзләгән шарлар булды.

Чара күңел ачу максатын гына күздә тотмады, җәмәгать юнәлешендә дә үтте. Беренче сыйныф укучыларына кайбер белгечлекләрне “таманлап” карау мөмкинлеге бирелде. Хәер, балаларның күпчелеге киләчәк һөнәрен сайлаган инде – спорт мәйданчыгы буеннан буена тезелгән беренче сыйныфлар аллеясыннан чыгып шундый фикер йөртергә була. Алар сайлаган һөнәрләр кызлар һәм малайларның фотолары астында күрсәтелгән. Бала-чага аеруча полиция хезмәткәре һөнәренә мөкиббән булып чыкты. Аннары табиб, төзүче һәм тәрбияче килә. Бу исемлекне артистлар төгәлли. Унҗиде беренче сыйныф укучысы фәкать Президент булачагын белдергән.

Күңел ачу мәйданчыгында да бала-чага күп иде, алар анда роботларга идарә итте, сурәт төшерде, кәгазьдән эшләнмәләр ясады.